بداية البدايات

أنا معرفش دي المرة الكام اللي أحكي فيها قصتي مع البرمجة، بس كل مرة بحكيها بنفس الشغف والحماس لأني بحب القصة دي جداً وتعلمت منها كتير. مش ف البرمجة بس لكن ف الحياة عموماً

الموضوع كله يا سيدي بدأ بطفل صغير فحضانة خاله جا من السفر (الكويت) وكلمه عن اختراع عجيب، كلمه عن تليفون "لمس" زي ما كان بيقول وقتها، تليفون فيه شاشة زجاجية ولكن لما بتلمسها بتتحرك!

 ف الحياة عموماً
الطفل ده مكانش مقتنع، الحقيقة لا هو ولا والدته ولا حد من اخواته اقتنع أن ممكن حتة قزاز تستجيب لحركة ايدي!

ده كان ف 2 حضانة تقريباً، بعدها بسنة ف 1 ابتدائي والده جاب لوالدته تليفون "لمس" فعلاً، ودي كانت أول مرة يشوف حاجة أقرب للخيال منها للواقع، وكانت أول مرة يحس أنه عايز يتعلم الحاجة دي ازاي بتشتغل؟
وقتها مكانش عندهم راوتر ف البيت، بس بيت جده كان عندهم!
الطفل ده كان بيستنى أي مناسبة علشان يروح بيت جده ويفتح نت يعمل اللي عايزه، طبعاً كطفل أول حاجة جات ف باله هي أنه يلعب، ف بقى يحمل ألعاب مستحيل يقدر يفتحها كلها أصلاً بس أهو بيحملها وخلاص، وكمان بدأ يستكشف عالم تهكير الألعاب...

lucky patcher, king root, game guardian, cheat engine (for PC)

بدأ يهكر أي لعبة تجي ف باله، متعة تهكير الألعاب كانت أكبر من متعة أنه يلعب اللعبة اللي هكرها أصلاً.. فضل كام سنة ع الحال ده، بيحمل ألعاب، يهكرها، يلعبها لحد ما يزهق منها، ويعيد الكرة من الأول!
لحد ما جات لعبة اسمها lords mobile..

الفرق بين اللعبة دي وكل الألعاب اللي فاتت أنها كانت اونلاين، بس هو مكانش فاهم ده، حاول يهكرها هو وأخوه الأكبر منه، قعد شهور بيشوف أي فيديو ويحمل أي تطبيق يقابله علشان يهكر اللعبة دي، بس مقدرش!
والمشكلة أنه مكانش عارف السبب.. لحد ما شاف فيديو على اليوتيوب موجود لحد دلوقتي وده الرابط بتاعه.. الفيديو كان بيقول أن شبه مستحيل تهكر اللعبة دي لأنها "اونلاين" وأنت بتتصل ب "سيرفر" علشان تلعب.. دي كانت أول مرة ف حياته يسمع الكلمات دي، كمان صاحب الفيديو قال أن فيه ناس شغالة وظيفتها تحمي اللعبة من أنك تهكرها وهيحذفوا حسابك لو هكرتها، الكلام ده كان غريب بالنسبة له!
ازاي لعبة على جهازي أنا فيه ناس بعيدة بتحميها؟
هما كده بيتحكموا ف تليفوني؟
وازاي يحذفوا حسابي؟
حسابي على تليفوني هما ملهمش دعوة!
ده كله خلى عنده أسئلة كتير ملهاش إجابات، ولأن مكانش عنده راوتر ف مكانش عنده الوقت يلاقي إجابات مناسبة للأسئلة دي!
يكبر الطفل ده ويوصل ل6 ابتدائي، ف السنة دي والده قرر يجيب راوتر للبيت، وده كان ببساطة صندوق أبيض سحري بيفتح عالم فيه إجابات لكل الأسئلة اللي ف مخ الطفل ده!
مع الراوتر، والد الطفل قاله ف مرة هو واخوه "بدل ما انتو بتلعبوا طول اليوم ع التليفون، ليه متتعلموش حاجة تفيدكم اسمها البرمجة".. الطفل سمع الكلمة دي من هنا وفتح اليوتيوب وبدأ يسمع أي فيديو فيه كلمة "برمجة".. أول حاجة تعلمها كان لغة اسمها 
HTML (hypertext  markup language)

ودي كان بيعمل بيها مواقع، لكنه كان خايف من اللغة دي، كان حاسس أنها هتجيب له مصيبة!
لأن ف مرة وهو بيتعلم قرر يعمل موقع فيه

a tag

وده ببساطة رابط، بس لما تدوس ع الرابط ده، كان بيحمل ملف موجود على لاب توب الطفل.. ودي كانت مصيبة!
العالم كله هيحمل ملفات اللاب توب كلها ويشوف صوره وهو بلبوص!
ف كان خايف يعمل أي حاجة الناس تشوفها ع النت!
سابها وراح تعلم حاجات تانية، هو مكانش فاهم يعني ايه برمجة ف كان بيتعلم بعشوائية بحتة..
تعلم unity, unreal engine, C#, python, kotlin, CSS

فضل على العشوائية دي لحد ما كبر ووصل 2 ثانوي.. ف 2 ثانوي شاف اتنين ع اليوتيوب كان طريقة كلامهم مختلفة عن باقي الناس، باقي الناس كانت بتقول الكلام اللي يعجب الطفل ده ويخليه مرتاح.. الاتنين دول كانوا دايماً بيقولوا كلام صعب، كلام الطفل بيتمنى أنه غلط، لكنه كان دايماً بيطلع حقيقي!
كل مرة.. يقولوا حاجة، الطفل يحس بالرعب منها، ويحبط لفترة، ويرجع يلاقي أنها صح!
الاتنين دول واحد فيهم اسمه الدكتور محمد أبو هدهود، والتاني هو الباشمهندس محمد مشرف!
وللحكاية بقية..